អាជ្ញាធរជាតិ សហការជាមួយគណៈកម្មាធិការត្រួតពិនិត្យគ្រឿងញៀនខេត្តព្រះសីហនុ ប្រារព្ធទិវា អន្តរជាតិ ប្រយុទ្ធប្រឆាំង គ្រឿងញៀន
02-July-2019 | ដោយ ពលមនសិការ
ព្រះសីហនុ៖ នៅថ្ងៃទី២ ខែកក្កដា ឆ្នាំ២០១៩ ទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០១៩ ក្រោមអធិបតីភាពឯកឧត្ដម នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន និងឯកឧត្តម គួច ចំរើន អភិបាល នៃគណអភិបាលខេត្តព្រះសីហនុ ដោយមានការអញ្ជើញចូលរួមពីតំណាងក្រុមប្រឹក្សាខេត្ត មន្ទីរ អង្គភាព នៃគណៈកម្មាធិការត្រួតពិនិត្យខេត្ត ក្រុង ស្រុក ជុំវិញខេត្ត ព្រះសីហនុ កងកម្លាំងប្រដាប់អាវុធគ្រប់ប្រភេទ យុវជនកាយរិទ្ធ កាកបាទក្រហម សិស្សនុសិស្ស តុលាការ និងអ្នកពាក់ព័ន្ធសរុបជិត៥០០នាក់។
ឯកឧត្តម គង់ វីតាណៈ អភិបាលរងនិងជាប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្តព្រះសីហនុ បានថ្លែងស្វាគមន៍ និងរបាយការណ៍ពីកិច្ចខិតប្រឹងប្រែងរួមគ្នាអនុវត្តតាមផែនការការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ បង្ការ ទប់ស្កាត់ បង្ក្រាបបទល្មើសគ្រឿងញៀនក្នុងខេត្តព្រះសីហនុ។
ឯកឧត្តម គួច ចំរើន អភិបាលខេត្ត បានមានប្រសាសន៍ ដោយកោត សរសើរ និងអរគុណ ដល់គ្រប់អង្គភាពជាសមាជិកនៃគណៈកម្មាធិការត្រួតពិនិត្យគ្រឿងញៀន ខេត្តព្រះសីហនុ ថ្នាក់ដឹកនាំអាជ្ញាធរមូលដ្ឋាន កងកម្លាំងប្រដាប់ អាវុធគ្រប់ប្រភេទ មន្ត្រីរាជការគ្រប់លំដាប់ថ្នាក់នៅ ខេត្តព្រះសីហនុ ដៃគូអង្គការមិនមែន រដ្ឋាភិបាល ជាតិអន្តរជាតិ ក៏ដូចជាវិស័យឯកជនសាសនា និងសប្បុរសជននានា ដែលបានចូលរួម និងគាំទ្រយ៉ាងសកម្មដល់ ការងារប្រយុទ្ធប្រឆាំងគ្រឿងញៀន តាមតួនាទីនិងភារកិច្ចពាក់ព័ន្ធ រៀងៗខ្លួន ប្រកបដោយសម្បជញ្ញៈ និងស្មារតីទទួលខុសត្រូវខ្ពស់ ពិសេសក្នុងគ្រប់ដំណាក់ កាលនៃយុទ្ធនាការប្រយុទ្ធប្រឆាំង គ្រឿងញៀន ខុសច្បាប់របស់រាជរដ្ឋាភិបាល និងបានអាននូវសារលិខិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ក្នុងឱកាសនោះ ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ បានថ្លែងថាប្រទេសកម្ពុជាមានភូមិសាស្ត្រនៅជិតតំបន់ត្រីកោណមាស និងអឌ្ឍច័ន្ទមាស ធ្វើឲ្យកម្ពុជា នៅតែប្រឈមទៅនឹងបញ្ហាគ្រឿងញៀនដែលជាបញ្ហាសង្គមដ៏ស្មុគស្មាញ សម្រាប់សង្គមមនុស្សជាតិទាំងមូល ជាមួយនេះ គណៈកម្មាធិការត្រួតពិនិត្យគ្រឿងញៀន ខេត្តព្រះសីហនុ ត្រូវបន្តយកចិត្តទុកដាក់លុបបំបាត់ឲ្យបានទាំងស្រុងនូវរាល់ បទល្មើស ជួញដូរ ប្រើប្រាស់គ្រឿងញៀននៅតាមក្លឹបកំសាន្ត ទីសប្បាយដ្ឋាននានាក្នុងដែនសមត្ថកិច្ចរបស់ខ្លួនមុនដំណាច់ឆ្នាំ២០១៩ ដោយសមត្ថកិច្ចទាំងអស់ត្រូវតែចៀសឱ្យបានដាច់ខាតនូវកុំ៤ គឺកុំពាក់ព័ន្ធ កុំនៅពីក្រោយធ្វើជាបង្អែក កុំបន្ធូរបន្ថយ និងកុំអន្តរាគមន៍ ក្នុងករណីបទល្មើសគ្រឿងញៀន។
ក្នុងឱកាសនោះដែរក្នុងនាម សម្តេចក្រឡាហោម ស ខេងនិងឯកឧត្តម នាយឧត្តមសេនីយ៍ កែ គឹមយ៉ាន ឯកឧត្តម នាយឧត្តមសេនីយ៍ មាស វិរិទ្ធ បានថ្លែងអំណរព្រះគុណនិង អរគុណ ព្រមទាំងសូមកោតសរសើរដោយស្មោះចំពោះថ្នាក់ ដឹកនាំកងកម្លាំងប្រដាប់អាវុធមន្ត្រីរាជការនៅតាមអង្គភាពពាក់ព័ន្ធអង្គការជាដៃគូជាតិ អន្តរជាតិ សប្បុរសជនសិល្បករ សិល្បការនី ពិធីករ ពិធីការនី អាជីវករនិងអ្នកពាក់ព័ន្ធទាំងអស់ ដែលបានចូលរួម និងគាំទ្រដល់ការងារប្រយុទ្ធ ប្រឆាំង គ្រឿងញៀន នៅខេត្តព្រះសីហនុ ហើយប្រពៃណីដ៏ល្អថ្លៃថ្លានេះនឹងស្ថិត នៅជាបន្តទៀត ដើម្បីយើងទទួលបាន លទ្ធផលថ្មីៗបន្ថែមនាពេលខាងមុខ ៕
ចំនួនអ្នកទស្សនា
- ថ្ងៃនេះ1151
- ម្សិលមិញ12101
- សប្តាហ៍នេះ13261
- ខែនេះ128411
- ឆ្នាំនេះ128411
- សរុប20570867